مسكت بأطراف الليل بقلم الشاعر المبدع العابد عبد الرحيم

/---- مسكت باطراف الليل
------------------------------/

لا انت مع ذا.......ولا........انت مع ذاك
كلمة تابعة كلمة والريح اللي جا يديك

فاقت مسكت باطراف الليل قوة
قالت: اخلع السلهام.......يا الظالمني

واش انسيتي وانسيتي ذيك الليالي؟
انسيتي لحبل اللي اوشم الوشمات؟

واش انسيتي ذوك الضربات؟
واش انسيتي ذوك الركلات؟

واش انسيتي عفاك يا خويا حاولوا علي؟
واش انسيتي ادموعي اللي حفرت لجفان؟

اخلع سلهامك يا لمحزم بالعصا عساس!
فات وقتك ملي كنتي للساعة رقاس!

حثى حال ما ايدوم على حالو يا الناسي
ايامك هاذي فاتت و عليك قالوا يا القاسي

*(كنتي طياب لمقارج عدتي رقاص التعارج)
واش خويا هذاك؟ لهوى اللي جا يديه.!

شحال من واحد كانت لو قيمة او شان عالي!

شحال من واحد باع راسو
فضل ايعيش فالذل هاني
هذاك... ......تليس اعطى ضهرو للتغراز.!

قال صاحبي كركاع بالخير انذكرو.!
*الكية فالبقر لحمير اتزعرط!
الكية فالبقر لحمير اتزعرط!
قلنا لو:

*يا كاسب لبقر لمن اتقول - حو- الى جاهم طيكوك؟

تجري جراهم تابع اللي شدتيه ديالك واللي امشى يخلف الله!

* عارف كل معاني اتصنغ ابودنيك يا الصاحب! *عارفني انعرفك غايب قلت حاضر يا الكاذب!

كان زينك اغزال كنتي تسلب لعقول بالسانك
سرت احرش اخشين هربتي لحباب جيرانك

واش اعقلتي على ذاك العام؟
جاحت الصابة احصدنا الجراد!

قل خيرنا و احلبنا الضباب
او لالة اومالي قلبت لقباب

واش اعقلتي على ذاك العام؟
باعوا واشراوا فينا الاجساد.!

بحبك و اغرامك ولعة و اهيام!
حباتك لقلوب...انسات الاحقاد!

والسم اللي فيك قتلك سرتي اسبول لاوي
سرتي في اطريق الشر واش اغواك الغاوي

العابد عبد الرحيم: 08/06/2020
ملهمتي الفقيه بن صالح